Wah spechal stoori bi wah veri talented Belizean sistah hu work
wid di Belizean Kiole Council fi promoot Kriole as wah
Languag ah ye oon...
Hayt ahn Lov
Yu Kyaahn Hayt Widowtn Lov
bai Silvaana Udz
Di ada day mi fren mi-di tel mi bowt aal ih jraama wid ih pikni pa.
"Gyal," ih baal. "Dat deh man da di moas selfish pees a persn."
"Weh yu meen?" Ah aks ahn, wid onli haaf a mi main pahn weh ih di seh
Afta aal, Ah mi bizi di pach wahn hoal eena mi frak. Ahn di needl mi
onli smaal, soh Ah mi-di squinch op mi yaiy di chrai fain di hoal
"Wel," mi fren ansa. "Fos ting, ih noh waahn sopoat ih oan pikni.
Ah had woz fi goh da Faamli Koat fi get ahn pay wahn lee moni evri
mont fi ih pikni. Ahn di gud Laad noa, wat wid skool rejischrayshan
ahn nyoo buks ahn nyoo yoonifaam, Ah shoar need da lee moni rait now."
"Wel ih kuda bi wos," Ah tel mi fren, az Ah kip aan di stich op ahn pach
op mi lee oal frak. "Yu pikni pa kuda mi-di liv wid yu ahn di moles yu
oan pikni – wat wid aal a di inses stoari weh deh bowt now-a-dayz.
Er yu kuda mi marid wahn nada man weh staat moles ih step-pikni, fu yoo daata!"
"Mek enibadi chrai dat," seh mi fren di jomp op. "Mee da wan pees a uman
weh wuda noh talarayt dat!" Bai disya taim, Ah mi nayli don soa op mi frak.
Soh Ah ton mi hoal atenshan tu mi fren. Shee mi bowt faati yaaz oal ahn stil
mi-di hoap dat Prins Chaamin mi deh rong di kaana. Matas bee dat ih mi don
divoas wan time ahn don liv wid too dedbeet pees a exkyooz fu man. Shee mi
stil di hoap fi fain Mista Rait.
"Yu noa weh Mista Rait liv"? Ah aks mi fren. Ih liv rait eena yu haat. Exsep
ih noh nayhn Mista Rait. Ih nayhn "Mai Rait"!
"Mai Rait"? mi fren aks wid wahn kanfyooz luk pahn ih fays. "Weh yu meen"?
"Ah luk gud gud wan pahn mi fren. Shee mi stil luk aahrait ahn ting,
wat wid ih koak batl shayp weh ih mi doz gat fahn taim. Ahn shee da mi wahn
laaya, wahn profeshanal uman. Yet, jos like honjrid a ada Bileez uman,
shee mi need fi geh di help a Faamli Koat fi geh ih pa pikni help sopoat ih
daata. Ah tel yu, hyooman naycha noh rispek nobadi! Soh, az Ah staat put op
mi needl ahn chred ahn foal op mi frak, Ah gi mi fren sohn advais
baan fahn expeerens.
"Gyal," Ah seh. "Mai rait meenz seh dat yoo gat wahn rait fi bi hapi
Yoo ga wahn rait fi shayp yu oan fyoocha. Noh dipen pahn no man fi help yu
fain yuself. Dehn Boodis pipl ga wahn sayin weh chranslayt eena Inglish laik
dis: "If it's to be, it's up to me." So goh deh strang, gyal!
Noh stodi weh nobadi di seh bowt yu az lang az yoo hapi wid weh yu di du"!