Kaya kong batahin
kung kaaway man ay dumatal,
Kahit sanlaksa nga sila
ay akin pang lalabanan;
Ngunit kaysaklap
kapag ang isang kaibigan,
Na lagi mong kasama
ang siya pang sa iyo’y magtalusira.
Ang kaibigang pangarap ko
ay di sa pangalan lamang,
Kundi magmamahal sa akin
sa lahat ng panahon;
Sa oras ng kagipita’t panimdim
ay kapatid na tutulong,
Payo at saway sa akin
ay hindi niya pagsasawaan.
Ngunit nangangamba pa rin
yaring puso kong humihibik,
Baka kaibigang natagpuan
ay kagaya rin ng mga nauna;
Isang bagong mukha
pero baka kaparis din nila,
Sabi’y magtatapat
‘yun pala ay manggagamit.
Hangad kong patunayan sa iyo
na ako nga ay kaibigan,
Subalit ito ay hindi ko pa
magagawa sa ngayon;
Akala mo lang, kaibigan,
ay hindi kita pinahahalagahan,
Ngunit ang totoo, buhay ko ay iaalay
kung para nga lang sa iyo!