Kung akin ngang aalalahanin ng masaklap na lumipas,
Ay halos bahagya na akong makagulapay;
Babagal-bagal, mahina, walang kaya at sadsad na sa hirap,
Ngunit nang lingapin ako ng Diyos buhay pa rin ako at malakas.
Ang wika nila sana raw ay hindi na ako isinilang,
Sapagkat masahol pa sa mangmang na salat sa karunungan;
Halos panawan na ako ng ulirat dahil sa mga tiisin,
At buhay ko ay binantaang wawakasan ngang madali.
Sa gitna ng mga paglibak ay nakabangon ako,
At nag-ani ng tagumpay dahil sa Panginoon;
Marami ang namangha ako daw ba ay may Diyos,
Sino daw ba ang kasama ko na sa akin ay kumukupkop.
Hanggang sumagi sa akin ang pahayag ng Biblia,
“Silang mga nagbubukid na nagtanim na may luha;
Na mga nagsiyaong dala ay binhi at mga nananangis,
Ay aawit din namang may galak, dala’y ani pagbabalik.”
Totoo ang kasabihang kapag ang Ama ang sinunod,
Ay magtataas Siya sa akmang kapanahunan;
Magpakababa ka lamang at maging matapat sa Diyos,
Ikaw na yagit sa paningin nila ay mapapasa Kaharian!