ang awit ng aking pangarap
sana marinig at madama mo sinta
pangsamantala mong pagbigyang
na mahawakan ang 'yong kamay
para mabawasan ang bigat ng pasanin
at makarating, masilayan ang kislap
ng ginto sa dulo ng bahag-hari...
sa aking pagtulog
biglang nagising sa langitngit
ng nagsasarang pinto
nadamang yapak na lumalapit
biglang nawala paparoon
sa hardin ng kaligayahan...
nangako ang mga tinig
na hindi ako iiwanan
ngunit sa isang sandali
lahat ay nawala
ako'y naiwan mag-isa, nangulila...
ang aking kalungkutan
maintindihan mo kaya?
'di ko sinubukang pigilin
hinayaan kong humayo
ang mga pangakong sumisigaw
sa daigdig ng katahimikan...
malamyos na tinig ng pagmamahal
parang awit na nakakalasing
makabagbag damdamin
bigyan mo sana ng pansin...
at sa pagsibol ng araw
hanggang dapithapon
nakatanim ako sa puso mo
agam -agam ay hindi balakid
at hadlang ng aking pangarap...
sa kalawakan, ang buwan ay nakangiti
mga bituin parang hiyas sa buhangin
sila ang nakakaalam, sila ang tanungin
kung anong sinasabi ang mga titik
at ang mga himig,aking mahal...
sa wakas narinig mo rin
and awit ng aking pangarap
pagbigyan mo sanang pangsamantala
para mahawakan man lamang
ang 'yong kamay at tayo'y sumayaw
para maibsan ang bigat ng pasanin...
at ating masilayan ang kagandahan
ng ating pagmamahalan...
pag-ibig at kapayapaan!
English Version
written by: Rey C. Cacabellos a.k.a. APO
Poetry Ambassador, The Poet Republic
English Version (coming soon)
to be written by: chitcyn
Administrator, The Poet Republic